Trobada damb eth Baile de Les

Auem anat a veir ath Sr. Baile de Les, Emili Medan, l'auem explicat que era nòsta Associacion Hemnes de Lés comence a caminar damb fòrça e l'auem entregat era següent carta, demanant bères causes entà era associacion, tal e com acorderem ena darrera trobada!

Era respòsta der Ajuntament ei molt positiua, mos ajudaran en tot aquerò que sigue possible! Acieu l'auetz:

Lés, 2 de gèr de 2012

Illtre. Sr. Emilio Medan

Alcalde de Les

Planvolut Senhor,

Eth passat 7 d’octubre auec lòc er acte de constitucion oficiau dera Associacion de Hemnes de Les. Aué hèm mès de cinquanta hemnes. Volem constituïr-mos coma ua entitat de representacion deth collectiu femenin locau deuant des institucions araneses, catalanes e transnacionaus.

Era Associacion Hemnes de Les s’estructure en tres vocalies que trabalharan tres àmbits diferents mès complementaris, en tot impulsar diuèrsi projèctes e activitats que contribusisquen ara visualizacion, coesion e desvolopament deth collectiu femenin. Aguesti encastres son:

1. Benestar e salut, a on se trabalharà entà melhorar era situacion personau e collectiva des hemnes de Les damb activitats, servicis, assessorament e infraestuctures relacionades damb eth benestar fisic e psicologic e damb era gestion e ocupacion deth temps de léser.

2. Transferéncia de coneishements, a on se trabalharà pera conservacion des coneishements tradicionaus des hemnes enes diferenti camps (gastronomia, artesania, gestion deth miei, etc.) e a on s’aufriran tanben esturments contemporanèus e naiu coneishements practics entà melhorar eth dia a dia deth collectiu femenin.

3. Emprenedoria e desvolopament locau, a on se trabalharà entà aufrir assessorament, supòrt e visibilitat entàs iniciatives empresariaus liderades per hemnes.

A mès, com non podie èster d’ua auta forma, eth supòrt a projèctes solidaris serà ua des activitats que prumèr amiaram entà dauant.

Damb aguest escrit volem demanar-vos eth vòste supòrt entàs nòstes activitats e iniciatives:

·  En tot ajudar-mos a hèr difusion des activitats organizades e en tot perméter era impression des cartèls informatius en vòste Ajuntament.

·  En tot autorizar-mos a plaçar un punt de recuelhuda de ròba ena entrada der Ajuntament de Les, entàs projèctes solidaris de SolidAran, Caritas e Tapones Solidarios.

·  En tot méter ara nòsta disposicion es locaus de proprietat municipau entà poder organizar es activitats e reunions dera Associacion de Hemnes.

· En tot collaborar economicament ena organizacion dera “Trobada Anual d’Associacions de Dones Rurals de l’Alt Pirineu i Aran” que aurà lòc en Les en 2012.

·  En tot sajar de trobar un locau a on poder deishar es estruments de besonh entàs activitats qu’organizaram, un espaci pro gran e confortable que servisque tanben entà acuelher aguestes activitats e corsi, a mès des reunions dera Junta dera Associacion.

Arregraïm eth vòste supòrt per auança e demoram qu’era nòsta iniciativa contribusisque em desvolopament locau deth pòble de Les.

Coraument,