II Reunion dera Associacion

Ager peth sèr mos tornèrem a amassar ua trentea d'hemnes ena sala d'actes der Ajuntament de Lés. Ja èm mès de 50 ena Associacion!

Aguestes son es propòstes d'activitats entath 2012 que vam a sajar de tirar endauant:

 

1. Benestar e salut (lèsser, exercici e conferències):

• Cicle de conferències, n'auem dues de planificades, ua sus eth cancer de mama damb era collaboracion d'AranSalut e ua sus era incontinència urinària, damb era collaboracion de Maria Remiseiro. 

• Creacion d'ua corau femenina, damb aires moderns, entà arrir e cantar. Ei ua activitat que pòt amassar-mos un còp per setmana ath long de tot er an.

• Organitzacion d'ua gessuda anuau, anar de viatge juntes, entà Barcelona, entà Madrid o entà a on volguesquem.

• Escòla de futbol entàs mainades deth pòble, ua activitat extraescolar entà crear cantera que continue damb eth prumèr equip de fotbol femenin dera Val d'Aran. 

• Creacion d'un Grop excorsionista, a partir dera primauera mos amassaram entà anar d'excorsion, hèr exercici e coneisher milhor es paisatges dera Val d'Aran.

• Projecte de Centre de dia dera gent grana, eth nòste projecte estrelha a long terme, perque era nòsta gent grana a de besonh aguest equipament.

2. Transferencia de coneishements (formacion):

• Elaboracion de productes (cremes, olis...) damb plantes e ellaboracion de sabons a partir d'oli reciclat.

• Informàtica básica entàs mès despistades e estruments de dissenh e comunicacion 2.0 entàs mès joenes, damb era collaboracion deth punt Omnia de Lés.

• Taller de ceramica.

• Corsi d'aranés, sustot escrit entàs que le parlam mès encara hèm fòrça fautes d'ortografia.

• Codina, damb era possibla collaboracion dera Escòla d'Osteleria de Lés.

3. Desenvolupament locau e dinamitzacion deth pòble:

• Cicle Cineforum, un còp ath mes, damb un audiovisuau e un debat posterior.

• Organitzacion dera trobada anuau d'associacions d'Hemnes ruraus deth Pirineu.

• Presencia en es fires deth pòble damb productes artesanaus

4. Solidaritat, com non podie èster d'un auta manera tanben auem es nòsti projectes solidaris:

• Recoelhuda de taps entath projecte "tapones solidarios". Podetz vèir de què va acieu. Eth punt de recoelhuda le plaçaram en Ajuntament de Lés.

• Supòrt a Caritas e a SolidAran en Lés, damb un punt de recoelhuda plaçat en Ajuntament que facilite amassar era ròba vielha sense auer de portar-la enquià Vielha.

• Creacion d'un Banc de temps, a on totes podem oferir servicis e demanar ajuda.

Fòrça activitats enta d'aguest 2012! Vos tieram informades de totes es novetats!

Eros an nau a totes!

II Trobada d'Associacions de Dones Rurals de l'Alt Pirineu i Aran - La Seu d'Urgell

Eth passat 27 d'octubre, just 20 dies despús der acte de creacion dera Associacion, Mireia Boya e Judit Nogueras aneren a representar as Hemnes de Les ena II Trobada d'Associacions de Dones Rurals de l'Alt Pirineu i Aran.

Mès de 120 hemnes de toti es parçans deth Pirineu se troberen, visiteren era catedral de La Seu d'Urgell e dineren amassa amenitzades damb era musica e es cançons des hemnes acordeonistes.

Mos agradec tant vèir que i a mès hemnes coma nosates que mos oferirem entà organitzar ua des trobades deth 2012 en Lés!

Acte de constitucion dera Associacion

Eth passat 7 d'octubre s'amasseren 27 hemnes de Lés entà constituir aguesta associacion. Er objectiu ei clar: hèr causes entà nosates e entath pòble de Lés. A partir d'acieu tot ei ganes e imaginacion.

Es estatuts les podetz consultar acieu

Auem dividit eth trebalh en 3 vocalies:

1. Benestar i salut, a on se trebalharà entà milhorar era situacion personau e collectiua des hemnes de Lés damb activitats, corsi, servicis, assessorament e infrastructures relacionades damb eth benestar físic e psicològic e damb era gestion e ocupacion deth temps de lèsser.

2. Transferencia de coneishements, a on se trebalharà pera conservacion des coneishements tradicionaus des hemnes enes diferenti camps (gastronomia, artesania, gestion deth medi, etc.) e a on s’oferiran tamben estruments contemporanis e naus coneishements practics entà milhorar eth dia a dia deth collectiu femenin.

3. Emprenedoria e desenvolupament locau, a on se trebalharà entà oferir assessorament, supòrt e visibilitat entàs iniciatiues empresariaus liderades per hemnes.

Se vos voletz hèr sòcies damb nosates sonque cau aumplir aguest formulari. Era cuòta anuau ei de sonque 20 euros.