Les, 24 de març de 2013
Mgfc Sr. Carlos Barrera
Sindic d’Aran
Conselh Generau d’Aran
Passeg dera Libertat, 16
25530 Vielha
Senhor,
Era Associacion “Hemnes
de Les” ei ua organizacion sense ànim de lucre que balhe impuls a diuèrsi
projèctes e activitats que contribusíssen ara visualizacion, coesion e
desvolopament deth collectiu femenin. Eth nòste principau àmbit d’accion ei eth
pòble de Les, més pòc a pòc mos convertim en referent entà d’autes hemnes dera
Val d’Aran. Ua part des nòstes accions se centren ena transferéncia de coneishements e ena dinamizacion locau
e, en aguest sentit, apostam fòrt pera difusion dera cultura tradicionau com a
motor de desvolopament e coesion.
En agost de 2012 presentèrem, per prumèr
còp, es nòstes prepauses laguens dera convocatòria des subvencions deth Conselh
Generau d’Aran en matèria de cultura e lengua, damb un projecte d’exposicion de
fotografies sus era istòria contemporanea dera nòsta Val, centrada enes
viuences deth collectiu femenin deth Baish Aran en temps dera postguèrra
espanhòla. Ère un projècte damb ua dobla foncion: per un costat, dar a
conéisher ua part dera nòsta istòria que cor eth risc de desparéisher e per un
aute costat, crear un esveniment físic de dinamizacion culturau en Baish Ara,
entà descentralizar era ofèrta actuau.
En respòsta ara nòsta
demana, receberem en data 7 de gèr, era notificacion oficiau de denegacion
d’aguesta demana per part deth CGA. Ara seguida, aportèrem eth certificat d’isenda
que se mos demanaue e, a data d’aué non auem tornat a recéber cap notificacion,
ne a favor ne en contra. Telefonicament se mos a dit qu’eth CGA mos a concedit
600 euros e que mo’les cau justificar abantes deth 31 de març de 2013.
Compreneratz donc,
qu’eth nòste sentit comun, com associacion sense ànim de lucre, mos ditz que çò
de prudent ei demorar a saber s’auem finançament entà tirar endauant aguestes
activitats. Non especulam damb es quòtes des nòstes associades; non gastam mès
de çò qu’auem e tota despena ei justificada jos era filosofia deth besonh, era
logica, er interés generau e eth sentit comun.
Damb aguesta carta, e un
viatge exposadi es antecedents, vos hèm a arribar eth nòste descontent e
suspresa damb era logica e eth desvolopament deth procès de concession de subvencions
en airau de cultura e lengua, pes motius que seguissen:
·
Eth calendari des
subvencions deth CGA non permet era planificacion per auança des activitats: s’era resolucion arribe en 2013, resulte impossible
justificar activitats qu’an estat realizades en 2012. Atau madeish, s’eth
posicionament deth CGA ei eth de qu’es possibles beneficiaris des subvencions
realizen es activitats sense saber se compden damb era collaboracion dera
maxima institucion, non resulte pas justificat qu’eth suposat patrocini deth
CGA apareishe ena publicitat des activitats.
·
Es projèctes
subvencionadi s’an convertit en un calaish de sastre generalista a on toti
sagen de precisar pòc es contenguts entà auer cèrt marge de maniòbra: projectar e desvolopar activitats sense saber se se
compdarà damb eth supòrt deth CGA ei, ath nòste enténer, entrar un sistema
pervèrs que, en part, mos a portat ara situacion de crisi e desafeccion
politica actuau. S’es institucions vòlen recuperar era sua credibilitat an de
melhorar es procèssi de subvencion e era accion de govèrn e hèr-les mès
transparents e democratics.
·
Ei de besonh apostar
pera qualitat mès que pera quantitat: era logica des
retalhades e es problèmes damb era aprovacion deth pressupòst deth CGA mos hèn
a pensar, en tot apelar ath sentit comun, qu’ei de besonh acabar damb es
projèctes pòc clari e qu’apòrten pòc ath conjunt des aranesi e araneses. Hèr
país signifique coesionar, reforçar era identitat individuau e collectiva,
autant laguens com dehòra des frontères dera Val d’Aran. E, se volem trabalhar
laguens deth nòste país, cau compdar damb es moviments sociaus, damb es
iniciatives innovadoras e desinteressades. Ei de besonh ramplir horats de
coneishement, cau apostar per naues maneres de hèr, cau reconéisher eth trabalh
dera societat civila... e entad açò ei de besonh dar supòrt economic sufisent a
determinadi projèctes. Era filosofia “un shinhau tà toti tà que non se digue”
non mos pòrte enquiara excelléncia de besonh en temps de crisi. Nosates apostam
per hèr dehòra deth sistèma dera mediocritat e er oportunisme.
·
Era cultura e era lengua
son qüestions centraus ena nòsta identitat:
ua institucion com eth CGA haurie d’apostar fòrt per projèctes e collectius que,
desinteresadament, trabalhen peth ben de toti es aranesi e araneses. S’era
cultura e era lengua son identitat, trabalhem per saber qui èm e d’on venguem.
Sonque atau poderam díder qu’èm aranesi. Aguest trabalh en cap cas pòt èster
generalizador e omogenizador: Aran ei format per diuèrsi collectius, entre eri
es hemnes, e toti an contribuit ara nòsta istòria collectiva. Reconeishem-les.
Valorem-les.
Pr’amor d’aguestes
rason, e damb eth còr ena man, vos demanam que:
·
replantegesquetz era
logica e eth calendari des vòstes subvencions,
·
mos concedisquetz ua
pròrrogra entà invertir melhor era quantitat concedida, complementant era
infima quantitat que receberam damb es subvencions deth 2013, as que tanben mos
presentaram damb eth madeish projècte entà non ipotecar era sua excelléncia.
·
condesquetz damb
organisacions civius com era nòsta entar assessorament en es diuèrsi ahèrs que
mos podessen interessar.
Volem implicar-mos,
volem proposar, volem hèr, mès non ac podem hèr soletes. Mos cau anar toti e
totes dera man.
Coraument,
Associacion Hemnes de
Les
C/
Quairon, 2 baix 2ª. 25540 Les
